प्लास्टिकचे जलसृष्टीवर होणारे दुष्परिणाम  
जमिनीवर टाकलेले प्लास्टिक पावसाच्या पाण्यासोबत वाहून नेले जाते. सांडपाणी वाहून नेणाऱ्या गटारी, नाले यामध्ये हे प्लास्टिक अडकून राहते आणि त्यामुळे पाणी तुंबून राहते. दरवर्षी मुंबई, पुणे सारख्या महानगरात पावसाळ्यामध्ये पाणी तुंबून राहण्याच्या समस्या निर्माण होत आहेत. यामागे प्रामुख्याने नागरिकांनी फेकून दिलेल्या  प्लास्टिकच्या वस्तू कारणीभूत असतात असे दिसून आले आहे. सरतेशेवटी हे पाणी प्लास्टिकसह नदीला मिळते, या नद्या समुद्राला मिळतात म्हणजेच प्लास्टिक शेवटी समुद्रात वाहून जाते. प्लास्टिकचा मुबलक वापर आपण मागच्या काहींच दशकांपासून करत आहोत तरीसुद्धा आज समुद्रांमध्ये एवढे प्लास्टिक जमा झाले आहे कि त्याची तरंगती बेटे तयार झाली आहेत. त्यांचा विघातक परिणाम जलसृष्टीवर होत आहे. समुद्री जीव अन्न समजून प्लास्टिक खातात आणि मृत्युमुखी पडतात. पाण्याबरोबर आत गेलेले प्लास्टिक त्यांच्या शरीरात अडकत आहे. यामुळे समुद्रातील अनेक जलचर प्राणास मुकत आहेत. प्लास्टिकचे अतिशय सूक्ष्म कण जलचरांच्या अवयवात साचत आहेत. अशा पाण्यातील मासळी खाल्ल्याने त्याचा दुष्परिणाम माणसावरही होत आहे. समुद्रात साठलेला प्लास्टिक कचऱ्याचे प्रमाण एवढे प्रचंड आहे की हे प्लास्टिक जमिनीवर अंथरल्यास संपूर्ण भारतात पाच फूट उंचीचा थर निर्माण होईल. 

अगदी एका वाक्यात सांगायचे तर प्लास्टिक मुळे आज आपली जमीन, पाणी, अन्न आणि हवा सुद्धा प्रदूषित होत आहे आणि हे प्रमाण वरचेवर वाढत आहे. याचा दुष्परिणाम थेट आपल्यावर आणि भावी पिढ्यांवर होत आहे.