अभियानाची कार्यवाही

प्रत्यक्ष वारी ही जून-जुलै महिन्यात असते मात्र प्लास्टिक थर्माकोल कचरा प्रदूषण मुक्त दिंडी अभियानाची सुरुवात जानेवारी पासून होते. यासाठी जवळपास १०० समन्वयक आणि २५० वारीमित्र काम करतात. आळंदी ते पंढरपूर आणि देहू ते पंढरपूर या दोन मार्गांवरील वारीमध्ये सहभागी देवस्थान समित्या, दिंडी चालक/ मालक, प्रवचनकार, कीर्तनकार, सामाजिक कार्यकर्ते, अन्नदाते यांच्याशी संपर्क साधला जातो. वारीमध्ये प्लास्टिक, थर्माकोल डिशेस तसेच स्टीलच्या ताट-वाट्या वापरल्या जाऊ नयेत त्या ऐवजी नैसर्गिक पानांपासून बनलेल्या पत्रावळी आणि द्रोण वापरावेत यासाठी आवाहन केले जाते. वारीमार्गावरील दोन महानगरपालिका, १५ नगरपालिका, १३० ग्रामपंचायती, तीन विद्यापीठे यांचाही अभियानात सहभाग असतो. प्रत्यक्ष वारीदरम्यान अगदी सुरुवातीपासून शेवटपर्यंत शेकडो कार्यकर्ते अभियानात सहभागी होतात. २०१९ सालच्या वारीमध्ये ३५ प्रशिक्षण शिबिरे, ६५ बैठका, ३८ प्रबोधन फेऱ्या यांच्या माध्यमातून ९४० अन्नदात्यांचे प्रबोधन केले गेले आहे. याची फलश्रुती म्हणून २०१८ आणि २०१९ या दोन वर्षांच्या वारी सोहळ्यात एकूण २.७० कोटी पत्रावळी आणि ३ कोटी द्रोण यांचा वापर केला गेला आहे. यामुळे ४.०६ कोटी  लिटर पाणी वाचवले गेले आहे. तसेच माती, जमीन, पाणी आणि हवेचे शेकडो वर्षे होत राहणारे अपरिमित नुकसान टळले आहे.