या समस्येची आणखी एक विदारक बाजू आहे. रासायनिक खते, कीटकनाशके यांचा दरवर्षी वाढत जाणारा खर्च शेतकऱ्यांच्या आवाक्याबाहेरचा आहे. सोबत जमिनीचे आरोग्य बिघडल्यामुळे पिकांची पाण्याची मागणी वाढत आहे. या बाबींमुळे सर्वसामान्य शेतकरी अगदी मेटाकुटीस आला आहे. सद्य स्थितीमध्ये त्याला शेती करणे परवडत नाही. यामुळे शेतकरी कायम आर्थिक संकटात सापडलेला असतो. यामुळे  कुटुंबाचे आरोग्य, अपत्यांचे शिक्षण या बाबींवर सुद्धा गंभीर परिणाम झाला आहे. महाराष्ट्रातील शेतकऱ्यांच्या वाढत्या आत्महत्यांची कारणे या सर्व समस्यांमध्ये आहेत. 

नुकसानीत असलेली शेती फायद्यात आणण्यासाठी सोबत पर्यावरण आणि जीवसृष्टीचे जतन करणे ही काळाची गरज आहे. यासाठी रासायनिक घटकांवर आधारित शेतीपद्धतीचा त्याग करून वैज्ञानिक गो आधारित शेती करणे हा एकमेव उपाय या सर्व समस्यांवर आहे. वैज्ञानिक गो आधारित शेती मध्ये कोणत्याही स्वरूपाच्या विषारी रासायनिक घटकांचा वापर केला जात नाही तर भारतीय (देशी) गाईचे गोमूत्र, गोमय (शेण) तूप यांच्यासोबत विविध आयुर्वेदिक वनस्पतींचे अर्क, काढे, चूर्ण यांचा वापर केला जातो.