शेतकरी आणि पशु यांचे नाते अगदी पुरातन आहे. पशूंच्या वापराशिवाय भारतातील शेतीची कल्पनाही करता येणार नाही. शेतीसोबत जोडधंदा म्हणून दुधाचा व्यवसाय बहुतांश शेतकरी करतात. पण यात व्यावसायिक आणि शास्त्रीय दृष्टिकोनाचा अभाव असल्याचे सर्वसामान्य चित्र आहे. दुभत्या जनावराचे संतुलित पोषण, त्याची देखभाल, आजार आणि उपचार याविषयी शेतकऱ्यांना त्यांच्या गोठ्यावर जाऊन प्रशिक्षण देणे ही आजची महत्वाची गरज आहे. दूध व्यवसाय फायद्यामध्ये चालवण्यासाठी आणि जनावरांचे आरोग्य सांभाळण्यासाठी छोट्या-छोट्या, अल्प खर्चिक घरगुती उपायांची माहिती त्यांना देणे हे सुद्धा आवश्यक आहे. दुर्दैवाने सध्यातरी या दृष्टीने व्यापक, संघटित प्रयत्न होत असताना दिसत नाहीत. अगदी साधे उदाहरण द्यायचे झाले तर कासेच्या रोगाची समस्या ही देशभरातील प्राण्यांवरील खर्चातील ७०% खर्चाला कारणीभूत आहे. तब्बल ७,००० कोटी रुपये या रोगाच्या उपचारासाठी दरवर्षी भारतात खर्च होतात. मात्र हा रोग होऊ नये यासाठी वेळीच प्रतिबंध करता येतो. दूध व्यवसायावर असे अनेक लहान मोठे मुद्दे आपला थेट प्रभाव टाकत असतात आणि शेतकऱ्याचे अर्थकारण बिघडवतात. दुग्ध व्यवसाय करणाऱ्या शेतकऱ्यांना या व्यवसायाचे शास्त्रशुद्ध प्रशिक्षण देण्यासाठी आणि हा व्यवसाय फायद्यात चालवण्यासाठी थं क्रिएटिव्ह पर्यावरण दक्षता कृती मंचाने हा प्रकल्प हाती घेतला आहे.